Our Blog

اهم حاجة تحطها فى بالك لما تيجى تشطب شقتك

ليه قبل ما تشطب شقتك مهم جدا جدا انك تكون معاك رسمة الاول؟ غيرت مكان التليفزيون قبل كدا؟ طب قولت بينك وبين نفسك قبل كدا يا ريتني كنت جبت السرير هنا؟ فكرت قبل كدا ان الحوض كان هيبقي احسن لو اتحط في الحيطة دي مكان دي .. لا وكمان كان ممكن اجيب حوض اصغر عشان وانا داخل الحمام بتنزق في الباب والحوض؟ طب انا عايز اغير مكان الغسالة والتلاجة .. عايز اجيب غسالة اطباق وهكذا ... لو حد سأل نفسه نوعية الاسئلة دي قبل كدا يبقي اكيد هيفهم جملة " ليه قبل ما تشطب شقتك مهم جدا جدا انك تكون راسمها الاول؟ " نمشي مع بعض خطوة بخطوة عشان نبين ليه لازم تبقي كل حاجة مرسومة: أولا: بدايتنا في اي مكان هنشطبه دايما بتبقي حاجة من ثلاثة: 1- توسيع او زيادة غرف . 2- تأسيس الكهرباء 3- تأسيس السباكة  لما يبقي معايا رسمة للمكان واشخبط عليها لحد ما اوصل للرسمة النهائية بتاعتي هتوفر عليا حاجات كتير جدا في الثلاث بنود دول, لأن لما اكون راسم ف بالتالي انا عارف أماكن كل الاجهزة الكهربائية والصحية فبالتالي عارف هحط فين بظبط صرف تغذية مياه الغسالة, فيشة الثلاجة فين, غسالة الاطباق والسخانات والتليفزيون بالاضافة للتكييفات. وأقدر منها احدد طب احط الغسالة في المطبخ ولا الحمام؟ طب لو الحمام يبقي أي حمام فيهم؟ احط الحوض هنا؟ .. لا هنا الحائط صغيرة يبقي في الحائط الثاني عشان وانا واقف ابقي مرتاح .. طب اجيب حوض مقاسه كام؟ .. طب اركب بانيو ولا اعمل كابينة زجاج؟ لا هنا مش هينفع عشان فيه شباك .. فيه جيبسوم بورد في السقف ولا لا عشان لو كدا اعمل حسابي في مواسير الكهرباء؟ ... نفهم من كل الاسئلة دي ان طبعا في الثلاث مراحل دول بالذات التفكير بيبقي كتير اوي ومحتاج قدرة عالية من التخيل .. تخيل بقي لو معاك رسمة مظبوطة بالمقاسات هتوفر عليك وقت ومجهود اد ايه في ايجاد حلول للاسئلة دي .   . ثانيا: بنبدأ في مراحل ما قبل التشطيب النهائي هنا انت تقريبا وصلت لثلث المسافة .. اللي هي ايه؟ ببدأ بقي ادور عشان اشتري (مش أركب) سيراميك او بورسيلين للحمامات والمطبخ والارضيات عموما للشقة او الفيلا سواء بورسيلين, HDF او رخام .. طب مش عشان انزل واتفرج علي الكلام دا كله لازم يبقي اصلا معايا مقاسات؟ سواء مقاسات الحمامات والمطابخ والارضيات وكل حاجة هتركب؟ عشان حتي ابقي عارف احاسب الشركة او المهندس بناء علي ايه بظبط؟ طب عايز اركب انواع مختلفة علي بعض, كميات كل نوع لوحده ايه بظبط؟ في وسط ما انا بشتري السيراميك بتاعي .. النجار بيركب الحلوق الخشب للابواب .. طب الابواب دي مقاساتها كام؟ الحلوق دي أطوالها ايه؟ الباب بيفتح يمين ولا شمال؟ بيفتح برا ولا جوا؟ هعرف منين الكلام دا كله وانا مفيش رسمة في ايدي بتقوللي الحاجات دي بوضوح؟ بدأنا مرحلة تأسيس الدهانات .. الكميات اد ايه؟ مون الدهانات اد ايه؟ هحاسب الناس ازاي؟ دخلنا علي الشبابيك .. مقاساتها اد ايه؟ مواصفاتها ايه؟ هنركب ورق حائط؟ حلو .. مقاسات الحوائط اد ايه؟ ركبنا السيراميك والرخام اللي اشتريناه .. هحاسب الناس علي كمية كام؟ باب الشقة مقاسه كام؟ خد بالك لو مصفح بتبقي مقاسات ثابتة .. هحتاج اوسع فتحة الباب ولا أصغرها؟ طب الحمد لله شطبنا الشقة خلاص .. يلا نتفرج ونتعاقد علي فرش .. هجيب المقاسات منين وانا بقول للمعرض أو المهندس أو النجار عايز الكنبة دي؟ السرير كام في كام؟ طب هل حجم السرير يقضي عندي في الغرفة؟ المطبخ مساحته كام؟ الدولاب دا ينفع هنا ولا هنا؟ الكرسي حلو اوي بس مش هينفع عشان كبير عايز حاجة اصغر .. وهكذا نفهم من كل الكلام اللي فوق دا ايه؟ أولا: قبل ما تتعاقد مع شركة أو مهندس لازم لازم تكون ماسك في ايدك الاول رسمة هندسية واضحة عليها كل حاجة اتفقت عليها من أول يوم من أول الرسومات المعمارية المبدأية لحد التصميم النهائي. ثانيا: كل تفاصيل ومواصفات البنود تكون مكتوبة بوضوح ومتفق عليها من الأول من أول اماكن الفيش والمواسير لحد تسليم المفتاح. ثالثا: دقة الرسومات والمواصفات تسهل الحسابات. رابعا: مش شرط اللي بيشطب الشقة يكون هو هو اللي بيفرش الشقة .. لو طلبت منه رسومات للفرش كمان اخره هيبقي رسمة بتوضح بس الاماكن وليس تفاصيل .. عايز تفاصيل ورسومات وتصميمات فرش بذاتها دي ليها ناسها ومكاتبها. خامسا و أخيرا: تأكد مليون في المية انك لو حاسس انك دافع قرشين زيادة في دقة الرسومات والمواصفات .. فعلي المدي البعيد انت الكسبان.

Read More 1 year ago

نظرة سريعة على قطاعات الالمونيوم الدارجة في السوق

بالنسبة لقطاعات الالومنيوم الدارجة فى السوق ومعروفه - قطاعات شركة السلام ( ps والسعد )  - قطاعات شركة الشريف على حسن ( الجامبو والتانجو والسوناتا) وشركة الشريف نزلت قطاعات جديدة  - قطاعات شركة فالفيه ( شركة قبارى ) - قطاعات شركة فولكانو ( الشركة الدوليه للدهانات) - قطاعات الوميل ( شركة الوميل) - قطاعات اخرى زى الاليو واليونيل والعربية وايجيبل ودول قطاعات خاصة غير متوفرة فى السوق الا من خلال شركاتهم فقط . لكن ميزة قطاعات السلام والشريف على حسن توافر اكسسوارهم فى السوق وبكثرة وانا بعتبره ميزة بسبب موضوع الصيانة لان مع العمر ممكن يحتاج الشباك او الباب صيانة فافضل يكون قطاع الشباك او الباب متوافر لان مش شرط الى ركبلى الشغل هو اللى يعملى صيانة فى اى يوم من الايام وموضوع مستوى الشغل بيبقى عبارة عن ضمير من ناحية اوزان الالوميتال واختيار الاكسسوار المناسب لحجم ووزن الشباك فا لازم يكون الفنى او المتخصص فاهم كويس مش مجرد شغل وخلاص لان كل قطاع ليه معايير بالاضافة كما ذكرت اختيار الاكسسوار بيتم حسب حجم الشباك ووزنه بعد الزجاج سواء سنجل او دبل لان الزجاج الدبل بيبقى ( 6 مل زجاج + 6 مل اسبيسر + 6 مل زجاج ) او ( 5 مل زجاج + 9 مل اسبيسر + 5 مل زجاج ) فالدلفة بتبقى تقيلة فاختيار الاكسسوار وساحبة وزن القطاع المناسب هاتفرق فى الشغل جامد ومافيش حاجة اسمها قطاع وحش وقطاع حلو الاختيار بيبقى حسب المقاسات وحسب امكنيات العميل ورأى الفنى او المهندس لاختيار المناسب للعميل حسب مكان الموقع او الشقة من ناحية الازعاج وشدة الرياح والشمس والتهوية ( قبلى او بحرى ) وبالتالى نوع الزجاج المستخدم . انتظروا المقالات القادمة عن انواع القطاعات ان شاء الله تحياتى  ا. تامر سعيد  مدير عام شركة ايكوميتال

Read More 1 year ago

الفرق بين الفرش التصنيع والجاهز

التصنيع والجاهز بحياد كامل للطرفين التصنيع : تختار خاماتك وترى مراحل التنفيذ وأرخص لأنه غير محمل بأعباء وتكاليف العرض لكنه إن لم تتوفر أمانة والتزام من يصنع لك فالموضوع فيه خلل كبير ووجع دماع وعدم التزام والانحياز للتصنيع على مرأى عينيك ومتابعتك يحتاج لخبرة كبيرة منك أو ثقة كبيرة فيمن أسندت له العمل ، ولكن من سلبيات التجربة أن تتوقع أن الآخر لا يعرف سعر السوق وتنتظر منه أضعاف حقك ( وهنا تحدث المشاكل ) لأن الأنسب للطرفين هو الاتفاق العادل الواضح المبين شروطه بالكامل ومستواه بمعنى : كل جودة يقابلها سعر عادل ولا تتوقع غير ذلك من أى ورشة أو مصنع والجاهز : كل المنتج ومستوى الفينش قدامك بشرط أن يكون ما يذكر لك من مسميات الخامات المستخدمة هو الموجود فعلا ، وبشرط أن تستلم ما رأيته بالجاليرى أو المعرض ومن مميزات الجاهز أنك بمنأى عن عشوائية إدارة الورش الصغيرة وضعف إمكانيات أصحابها وأيضا تستلم فى مواعيدك بلا خلل أو ظروف لكن تدفع ضعف سعر التصنيع غالبا لأن المنتج تم تحميل سعره بإيجار المكان الفخيم وعمالته ومهندسيه وتنقلاتهم وإعلاناتهم هذا بأمانة مبتدأ ما سأكتب قريبا ( وبدون كلام من قبيل أن المحلات الكبيرة صادقة أو الورش الصغيرة كذابين ؛ لأن المحلات الكبيرة غالبا بيكون مصادر أعمالها هم تحفجية الورش الصغيرة ولكن أصحابها المعارض والجاليريهات غالبا يقولون لك : من مصانعنا لأن قلة قليلة منهم فعلا لديهم مصانع وورش يمتلكونها ، أما الغالبية العظمى فيعتمدون على الورش أو تجار جملة غير المدهون ( الأبيض ) بالقاهرة ودمياط ومناطق أخرى تنافس بجدارة ويقتصر دورهم على الاختيار وتوفيق الأقرب المتوفر من طلبات العميل ________________________ #أتيليه_النحات الفنان/ سامى الغباشى

Read More 1 year ago

معلومات مهمة عن التصنيع قبل الســـــــــــــــــــؤال عن السعر

1_ الحدايد والاكسسوار : اسأل عن نوع المفصلات والجرار وماركاتهم الأصلية أو الصينى لأن الموضوع بيفرق جامد بين مفصلة واحدة ب 15 جنيه مثلا ومفصلة بـــ 100ج والاتنين شبه بعض بس الكفاءة بتفرق وفيه فرق بين ( مجرى درج ) بـ 30 ج ومجرى درج بلوم أصلى يعنى الانحياز للأرخص مش دايما بيكون صح والشخص اللى بيقول لك سعر رخيص مش دايما فى صفك اسأله الأول عن نوع الحدايد والاكسسوار 2_ الكونتر : مسمى واحد والفئات متعددة ويتراوح سعر الألواح الشائعة من 300 ج إلى 600ج وكله اسمه كونتر وملزوق أو ساده ولذلك وقبل الاهتمام بالسؤال عن السعر بإلحاح اسأل وتأكد من الجهة اللى هاتصنع لك نوع الكونتر إيه ؟ وحاول تبص دايما فى حرف الكونتر اللى بيشتغل به قبل تركيب القواشيط الزان اللى بتتركب على الحروف الأنواع الرديئة غالبا بيكون فيه فوارق بين السؤاسات الموسكى اللى جوه وبيكون فيه ما يشبه نشع خفيف على أسود لأنه بيكون خشب قديم ومتجمع أما الجيد فبتكون السؤاسات متلاحمة واللحامات لونها فاتح ومفيش نشع ولو الشغل ( كبس ) مهم يكون على أصوله ( والفاضى مناسب للمليان ) مش مجرد سؤاسين خشب قديم زى ما بنشوف فى الشغل الشعبى أو اللى بينافس فى الأسعار وبعض العملا بيفرحوا بأسعاره الرخيصة وبالتالى ..اللى هايقول لك سعر يعجب حضرتك اسأله عن نوع الكونتر والحدايد ( الاكسسوار ) المفصلات والجرار ونوع خشب الزان اللى بيشتغل به ومش كفايه مسميات يقولها لك مهم المشاهدة بالعين أو تستعين بحد عنده خبره وحتى مستوى (مُلة السرير ) لأن فيه مله بــ 200ج وفيه مله خفيفة العُقد ( الدواير السوده ) أو صافية تماما بيوصل سعرها 700ج 3_ الخشب : و اسأل عن نوع الخشب وتأكد أن المسمى اللى اتفقت عليه هو اللى اتنفذ لك فعلا مش كفايه كلمة خشب زان أحمر المتداوله دى أنواع الخشب اللى اسمه زان بتتراوح ما بين 6 آلاف لحد عشرين ألف وبالتالى قبل الانحياز إلى الأرخص اسأل عن نوع الخشب المستخدم أو استعين بحد خبرة ومش كفايه حد يقول لك خشب زان أحمر *4 _ الدهانات : _______ مسمى الدهانات واحد ؛ ولكن الخامات تختلف وتتفاوت أسعارها يعنى لما تُطلب " أُستر " مهم تحدد النوع أو لو متعرفش اسأل عن المتاح عند اللى هاتصنع عنده لأن حضرتك مثلا ممكن تكون حبيت "اسم الأُستر " فى غرفة قديمه عن العائلة لكن الأستر المتاح بأسعار النهارده معظمها رش بالكومبوروسر لكن اللى حضرتك كنت بتشوفها زمان أو فى البايوهات القديمة دى بالنعومه واللمعه الساحرة ، دى كانت دهان بإيدين ناس الله يبارك لها ، كانوا بيشتغلو بالقطنه لحد أكتافهم ما تتخلع ... والنهارده علشان تدهن غرفة كامله بالقطنه أو بالمسمى المعروف ( الشاشه ) فالغرفة هاتتدهن بحوالى 10 آلاف جنيه .. وبالتالى مش من المنطقى إن حضرتك تكون طالب غرفه بعشرين ألف مثلا وتتوقع إن الدهان لوحده هايكون بعشرة آلاف .. الطبيعى إنها هاتتدهن ما بين 2500 و 3000ج دهان حلو وجميل لكنه مش اللى بالقطنه اللى كنت بتشوفه زمان ... الصـــــــــــــح ... الاتفاق على عينات دهان على خشب مش كتالوج ، ولو فى خيالك دهان معين ممكن تخلى اللى هاينفذ لك يشوفه بالعين قبل ما يقول سعر أو اتفاقات ...، وكذلك الدوكو العادى والدوكو ( الفرن ) واللاكيه المغسول بمستوياته أما الذهب .. فده أكيد لازم تحدد نوعه لأن الأسعار تتفاوت بشكل رهيب ما بين البودره والورق المتداول والذهب الفرنساوى ولذلك مهم جدا قبل السؤال عن السعر تحدد كل تفاصيلك لأن أى منتج بشكل عادل أكيد هايكون داخل قيمته السعريه العادلة ولا تتوقع غير ذلك وفى النهاية والفيصل دائما : كل جودة يقابلها سعر " عادل " متفق عليه كتابة ( صديقُك من يصدقك القول .. وليس من صدّقك فى كل ما تقول

Read More 1 year ago

أكتر 8 أخطاء تجنبهم و انت بتصمم شقتك

نصايح سريعة و انت فى مرحلة التصميم هتستفاد بيهم و هيخلوا شكل شقتك احلى بكتير

Read More 1 year ago

اهم 13 حاجة تحطها ف بالك لو هتبدأ تشطب شقتك

حاجات مهمة لازم تحطها ف بالك عشان تعيش مرتاح

Read More 1 year ago
Main Categories Designs Daily Prices Popular